«Рауан» ЖШС еңбек ұжымымен «Ұлт денсаулығы – Қазақстанның табысты болашағының негізі» тақырыбында онлайн басқосу ұйымдастырылды. ZOOM платформасы арқылы өткен кездесуді «Nur Otan» партиясы Әл-Фараби аудандық филиалы төрағасының бірінші орынбасары З.Н. Усупахметов жүргізіп отырды. Оның айтуынша ұлт денсаулығын жақсарту ісінде еліміздің медицина саласы едәуір ілгерілеуге қол жеткізуде. Бұл туралы Елбасы «Қазақстан-2050» стратегиясында ерекше атап өткен.
Шын мәнінде, халықтың денсаулығы – ел дамуының аса маңызды тұтқасы, болашағымыздың кепілі екені анық. Денсаулық – алғашқы байлық деген аталы сөздің де терең мәні бар. Әсіресе қазіргі пандемиялық ахуалда, денсаулық күтіміне бұрынғыдан да жіті мән беру маңызды. Осы орайда, аталмыш іс-шараның мақсаты – халықты салауатты өмір салтына шақырып, өз денсаулығына жауапкершілікпен қарауды насихаттау болатын.
Кездесуге қатысқан «Рауан» ЖШС инженері Сағадат Алтаев: «Жеке адам мен қоғамның ең басты байлығы – денсаулық. Денсаулық адам тіршілігінің ең бірінші шарты. Спортпен айналысу, салауатты өмір салтын ұстану денсаулық кепілі», – деп спорттың маңыздылығына тоқталып өтті.
Айта кету керек, Тәуелсіздік алғаннан бері Қазақстан медицинасы алға қарыштап дамып келеді. Мемлекеттің жүйелі қол¬дауы арқасында денсаулық сақтау саласы жақсарып, халық денсаулығының сапасы артты. Дегенмен, алдымызда әлі де бірқатар ауқымды міндеттер тұр .
