«Тұрғындарды баспанамен қамтамасыз ету үшін 2005 жылдан бері мемлекеттік бағдарламалар жүзеге асырылып келеді. Дегенмен, халықтың тұрғын үйге деген сұранысы әлі де жоғары», – деп тұрғын үйімен қамту мәселесі назарда екенін айтқан болатын Елбасы.
Қазіргі таңда осы мәселе аясында Шым шаһарда да атқарылып жатқан тындырымды тірліктер жоқ емес. «Нұрлы жер» мемлекеттік бағдарламасы бойынша жыл сайын халықтың әлеуметтік жағынан осал топтарына сатып алу құқығынсыз тұрғын үй жалға беріп келеді. Бірыңғай тұрғын үй саясатын іске асыруды көздеген бағдарлама бірқатар нәтижелерге жеткенмен, түйткілді мәселелер қарасын көрсетпей қоймайды.
Бүгінде осы бағдарламаны іске асыру мақсатында қалалық мәслихат депутаттарының қатысуымен партия фракциясы жанындағы комиссияның онлайн-отырысы өтті. Жиында «Нұрлы жер» мемлекеттік бағдарламасын жүзеге асу туралы айтылып, алдағы уақытқа жоспарлары талқыланды.
