Бүгін «Nur Otan» партиясы Еңбекші аудандық филиалының ұйымдастыруымен «Нұрлы жер» бағдарламасы аясында басқосу өтті. ZOOM желісі арқылы өткен жиында партияның фракция мүшесі Қайрат Ақмолдаұлы Мейрманов бағдарламаның жүзеге асу қарқыны жайында баяндады. Жиын қатысушылары «Нұрлы жер» бағдарлама аясында Шымкент қаласында жасалып жатқан тындырымды тірліктер мен түйткілді мәселелерді де талқылады.
Кездесуде мәлім болғандай, қазіргі таңда Шымкент қаласы бойынша 40752 азамат тұрғын үй кезегіне тіркелген. Биыл бағдарлама бойынша сатып алу құқығынсыз жалдамалы түрде Ұлы Отан соғысы ардагелеріне, жетім және ата-қарауынсыз қалған балаларға, көпбалалы отбасыларға, халықтың әлеуметтік әлсіз тобы мен жұмыс істейтін жастарға 1596 пәтер берілген.
Сондай-ақ «7-20-25» бағыты бойынша 1292 азамат, «2-10-20» бағыты бойынша 285 отбасы тұрғын үймен қамтылған. Биыл «Нұрлы жер» бағдарламасы аясында қалада 70 көпқабатты үйге күрделі жөндеу жұмысы жүргізілген.
