Шымкент қаласының өнеркәсіп саласында 689 кәсіпорын белсенді жұмыс жасауда. Оның 24 ірі және 49 орта кәсіпорындар. Аталмыш кәсіпорындарда 32 мыңнан астам адам еңбек етеді. Бұл туралы Шымкент қаласы әкімдігінің баспасөз қызметі мәлімдеді.
Атап айтар болсақ, осы жылдың үш айында бұл кәсіпорындарда 180,4 млрд. теңгенің өнімі өндірілді. Өткен жылдың кезеңімен салыстырғанда 41,4 млрд. теңгеге немесе 12,7 пайызға артық. Яғни, бірінші тоқсанның нақты көлем индексі бойынша 112,7 пайызды құрайды. Ал, осы көрсеткіш бойынша Шымкент қаласы Нұр-Сұлтан, Алматы қалалары мен Алматы облысынан кейін төртінші орында.
Ал, өнеркәсіп саласында үлесі 83 пайызды құрайтын өңдеу өнеркәсібінде 149,8 млрд. теңгенің өнімі өндіріліп, 37,4 млрд. теңгеге немесе 12,9 пайызға өсті. Осылайша, нақты көлем индексі 112,9% жетті. Ал бұл көрсеткіш бойынша Шымкент қаласы 6 орында.
