Елімізде жұмыспен қамту мен кәсіпкерлікті дамытуға бағытталған «Еңбек» бағдарламасының іске асып жатқанына биыл төртінші жыл. Аталған бағдарламаның арқасында кәсіпкерлер кәсібін дамытып жатса, жаңадан кәсіп бастаймын деген азаматтар қайтарымсыз грантқа ие болып келеді.
Солардың ішінде қоқыс қалдықтарын шығару қызметімен айналысатын Шымкент қаласындағы «ЕР-Нұр» ЖШС-гі төменгі пайызбен несие алып, жұмысына қажетті қондырғы сатып алды.
Мекеме директоры мемлекеттік бағдарлама шеңберінде «Нұрбанк» АҚ арқылы арнайы техниканы сатып алу үшін жылына 6%-бен несие алды. Кепілдің жетіспейтін сомасын «Даму» қоры өз кепілдемесімен толықтырды.
Бөлінген қаражатқа кәсіпкер XCMG фирмасының 2 фронтальды жүк тиегішін сатып алды. Соның арқасында кәсіпкер қатты қалдықтар шығару көлемін арттырып, нарықтағы қызметін сенімді көрсетуге мүмкіндік алды.
Кәсіпорын басшысы Алпамыс Мақұлбековтың айтуынша, мемлекет тарапынан көрсетіліп жатқан жеңілдіктер – шағын және орта бизнестің тынысын ашады. Яғни, қатты қалдықтарды шығару бойынша ұсынылатын қызметтердің жоспарлы көлеміне қол жеткізуге және нарықтан лайықты орын алуға мүмкіндік берді-дейді.
Шымкент қаласы әкімдігінің баспасөз қызметі
