Шымкент қаласы аумағындағы ішкі орам және шалғай елді мекендердегі көшелерге жүргізілген зерделеу жұмыстарына сәйкес, топырақ жабындысы бар 172 шақырым көше анықталды.
Жоспарға сәйкес, биыл 153 шақырым топырақ көшелерге тас төсеу жұмыстары атқарылады. Қазіргі таңда жеңімпаз мекемемен келісімшарт түзілді. Жөндеу жұмыстарын шілде айында аяқтау жоспарлануда. Бұл туралы Шымкент қаласы әкімдігінің баспасөз қызметі мәлімдеді.
Оған қоса, қала аумағында шағал тас жабындысы бар 1046,4 шақырым көше бар. Инженерлік коммуникация (газ тарту, кәріз жүйелері, ауыз су) жұмыстары барысында қайта қалпына келтіру өз деңгейінде жүргізілмейді.
Соның салдарынан шағал тас жабындысы бар 180,1 шақырым көшелердің техникалық жағдайы нашарлап, қайтадан тас төсеу жұмыстарын жүргізуді қажет етуде. Осыған байланысты шағал тас төсеу жұмыстары да кезең-кезең бойынша жүргізіледі.
