Шымкент қаласында «Бизнестің жол картасы – 2025» Мемлекеттік бағдарламасы аясында 2021 жылға 5, 9 млрд. теңге қаржы бөлінген.
Жалпы бүгінгі таңда 544 жобаға 2 млрд. теңгеге жуық қолдау көрсетілді. Бұл туралы Шымкент қаласы кәсіпкерлік және индустриалды-иновациялық даму басқармасы мәлімдеді.
Ағымдағы жылы сыйақы мөлшерлемесінің бір бөлігін субсидиялау бойынша 5,1 млрд. теңге, кредиттер бойынша кепілдіктер беруге 600 млн. теңге қаржы қаралған. Грант бойынша 2 млн. теңгеден 5 млн. теңгеге дейінгі жаңа бизнес-идеяларды іске асыру үшін өтеусіз негізде гранттар беруге 196 млн. теңге бөлінген. Аталған грант бойынша конкурс шілде айына жоспарлануда. Жыл соңына дейін бөлінген қаржыны мақсатты қолданып, игеру жоспарлануда.
«Даму» кәсіпкерлікті дамыту қоры» АҚ «Бизнестің жол картасы -2025» мемлекеттік бағдарламасының қаржылық операторы болып табылады және ШОБ субъектілеріне несиелер бойынша сыйақы мөлшерлемесін субсидиялау және екінші деңгейлі банктердің кредиттеріне кепілдік беру жолымен үш бағытта қолдау көрсетеді. Бірінші бағыт : моноқалалар, шағын қалалар мен ауылдық елді мекендер кәсіпкерлерінің қаржыландыруға қолжетімділігін арттыру, оның ішінде отбасылық кәсіпкерлікті дамыту. Екінші бағыт : өңдеу өнеркәсібі өндірген өнімінің көлемін ұлғайту. Үшінші бағыт : шетелдік валюталардың ауытқуларына байланысты валюталық тәуекелдердің кредиттік тәуекелдерге көшуіне жол бермеу.
