ҚР Парламенті Мәжілісінің депутаты, «Nur Otan» партиясы фракциясының мүшесі Фахриддин Әбдінәбиұлы Қаратаев Тұран шағын ауданында салынып жатқан тұрғын үй құрылысының барысымен танысты.
Биыл Шымкент қаласында жалпы 1 миллион шаршы метр тұрғын үй салынады деген жоспар бар. Соның ішінде «Өзгерістер жолы: Әр азаматқа лайықты өмір!» атты «Nur Otan» партиясы Шымкент қалалық филиалының 2021 – 2025 жылдарға арналған сайлауалды бағдарламасы аясында 661 мың шаршы метр тұрғын үй салынады. Бұл 5562 пәтер, яғни осынша отбасы баспаналы болады деген сөз.
Тұран шағынауданы қазір мегополистің көпқабатты тұрғын үйлер салынып жатқан негізгі құрылыс аймағы деуге болады. Мұнда жалпы 79 көпқабатты үй бой көтереді. Мәжіліс депутаты Ф. Қаратаев «ОТАУ групп» компаниясы салып жатқан 12 қабатты 5 үйді аралап көрді. Жақында тұрғындарға пайдалануға тапсырылатын үйлерге мемлекет тарапынан 4,996 миллиард теңге бөлінген. Құрылысқа пайдаланылған құрылыс материалдарының 90 пайызы өз елімізде шығарылған.
Мәжіліс депутаты Ф.Қаратаев салынып жатқан үйлерде көлік қоятын орынның аз екеніне назар аударды. Қазір тұрғындардың тұрмысы жақсарған. Кей үйлерде екі көліктен бар. Ертең осында көшіп келіп, жайғасқан соң, көлік қоятын орын таппай талас болып қалуы мүмкін екенін айтты. Сол себепті, үйді жоспарлаған кезде осына ескеру керек.
Құрылыс басқармасының өкілі осы жағдайды ескеріп, үлкен автотұрақ салынып жатқанын жеткізді. Мәжіліс депутаты құрылыс компаниясына еліміз тәуелсіздігінің 30 жылдығына орай жасалған үлкен баннерді пайдалануға берілетін үйге іліп қоюды ұсынды. Бұл патриоттық қадам болады деп түсіндірді.
