Шымкент қаласының тұрғыны Шынар Сарыбаева – тігін шебері. Ол қазақи нақыштағы құрақ көрпе-төсек, бесік жабдықтарын жасаумен айналысады.
Шынар Пернебекқызы өзінің кәсібін дамыту мақсатында былтырғы жылды 3 айлық қысқа мерзімді кәсіптік оқыту курсын оқып, куәлік алған соң, қайтарымсыз мемлекеттік грантқа құжат өткізді.
Нәтижесінде тігін шебері өзінің бизнес жобасын сәтті қорғап, қыркүйек айында «Еңбек» мемлекеттік бағдарламасы шеңберінде грантқа қол жеткізді.
– Өзіме ұнайтын іспен айналысып, қазақтың ұмыт болған ою-өрнектерін заманауи үлгідегі бұйымдар мен киімдерде нақыштап безендіруге тырасамын және ең бастысы тапсырыс жасаушылардың көңілінен шығады – дейді бағдарлама қатысушысы.
Бүгінде қала тұрғыны өз тігін шеберханасын ашып, тапсырысқа заманауи үлгіде түрлі ою-өрнектелген қыз жасауларын, көрпе-төсек жабдықтарын және т.б. тұрмысқа қажетті заттарды жасауды қолға алған.
Айта кетейік, өткен жылы «Бастау бизнес» жобасы аясында 2820 адам оқыды. Ал биылдың өзінде осы жоба бойынша 600 адам грантқа ие болды. Сонымен қоса, 1900 азаматқа «Бизнес бастау» оқу курсына жолдама берілді.
