Бүгін аудан әкімі Арман Сәбитов Орталық перзентханаға барып 14 қарашада өмірге сәби алып келген аналарды арнайы құттықтап, жылы лебізін жеткізді. Бұл күні ауданда 11 бала дүниеге келді, оның ішінде 7 қыз, қалған 4 ұл.
Халықтың деректер базасының мәліметіне сай 2023 жылдың 14 қарашасында Қазақстанда халық саны 20 милллионға жетіп, тарихи оқиға тіркелді. Бұл күні Ұлытау, Жетісу, Атырау, Ақмола және Түркістан облыстарында таңғы сағат 8.10-да туған 5 бала еліміздің 20 миллионыншы тұрғыны атанды. Осыған орай аудан әкімі Арман Сәбитов сол күні ауданда дүниеге сәби әкелген аналарды құттықтады: «Бұл әрине Еліміз үшін үлкен қуаныш. Сүйінші сұрайтын жаңалық. Шын мәнінде. Еліміздің демографиялық дамуына сайрамдық аналардың да үлесі зор. Биыл ауданымызда 5050 сәби дүние есігін ашты. Бұл көрсеткіш жыл сайын өсіп келуде. Сәбилеріңіздің бауы берік болсын! Еліміз өркендей берсін!»,-деп айтты аудан басшысы.
Еске сала кетсек, 1991 жылы Қазақстан Республикасының халық саны 16,4 млн адамды құрады. Тәуелсіздік жылдарында ел халқы 22,3% өсті. Мәселен, 2022 жылы 1991 жылмен салыстырғанда туу саны 353,2 мыңнан 403,9 мың адамға дейін немесе 14,7% өсті.
Жалпы демография динамикасына сәйкес, тәуелсіздік алған жылы Қазақстан халқының саны 16,4 миллион адамды құрады. Содан бері ел халқының саны 22-ден астам пайызға өсті. ҚР СЖРА Ұлттық статистика бюросы басшысының орынбасары Мақсат Тұрлыбаевтың айтуынша, өңірлер бойынша халықтың ең көп өсуі Шымкент қаласында, Түркістан және Маңғыстау облыстарында байқалды – 22-24%.
«Тәуелсіз Қазақстанның бүкіл тарихында бала туудың ең жоғары мәні 2021 жылы тіркеліп, 446 мың баланы құрады. Ал көші-қонның ең жоғары оң сальдосы 2006 жылы болды. Биылғы жылдың деректеріне сәйкес, тоғыз айда дүниеге келгендер саны 291 мың адамды құрады. Осылайша, халықтың табиғи өсімі 194,8 мың адамды құрады. Бұл орта есеппен бір айда 22 мың адам немесе күніне шамамен 750 адам деген сөз», – деді спикер ОКҚ алаңында өткен баспасөз конференциясында.
Сондай-ақ, биылғы 9 айдың қорытындысы бойынша оң сальдо қалыптасты, яғни, елімізге тұрақты тұруға сыртқа кеткеннен гөрі көп адам келген.
Спикер облыстар бөлінісіндегі халықтың қазіргі саны бойынша тұрғындардың ең көп саны Түркістан облысында – 2,1 млн, Алматы облысында – 1,5 млн, Жамбыл облысында – 1,2 млн адамды құрағанын атап өтті.
