Түркістан облысы, Отырар аудандық ауыл шаруашылығы бөлімі мен тиісті сала өкілдерінен құрылған насихаттық топ елдімекендерді аралап, биылғы жылы мол өнім алуды көздеген шаруашылық өкілдеріне түсіндіру жұмыстарын жүргізген болатын. Бүгінгі таңда Отырар ауданының климаттық ерекшелігі назарға алынып, ауыл округтерінде егілетін жер көлемі мен дақыл түрлері нақтыланып, көктемгі дала жұмыстары басталды.
Топыраққа түрен салған шаруалар жылына бір алқаптан 2, 3 өнім алу жобасын қолға алды. Нақтырақ тоқталсақ, Қарақоңыр ауыл округіндегі «Арыс дала» жауапкершілігі шектеулі серіктестігі 2 гектар жерге ерте пісетін «Кевии» сортты қырыққабат (капуста) егіп, өз тәжірибесіне енгізді.
Серіктестік төрағасы 50 күнде толық өсіп жетілетін қырыққабатты сәуір айының аяғына дейін мол өніммен жинап алуды, одан кейін осы алқапқа қызанақ, қияр дақылдарын егуді жоспарлап отыр.
Ләззат САРЫБАЕВА.
