Шымкент : Жем-шөп құнын арзандату үшін шаруаларға қаржылай қолдау көрсетіледі

Мал шаруашылығын жем-шөппен қамтамасыз етуде «Шымкент қаласы бойынша 2021-2022 жылдарға арналған жем-шөп дайындау» іс-шара жоспары бекітілді. Осының аясында бүгінгі таңда мал азықтық дақылдарын ұлғайту жұмыстары жүргізіліп келеді.
Қала бойынша мал азығына қажетті жем-шөп 358,5 мың тоннаны құрайды. Жыл сайын өзімізде 186,4 мың тоннасы дайындалады. Яғни қазір жергілікті шаруалар арқылы қажеттіліктің 52 пайызы қамтамасыз етілуде.
Ауыл шаруашылығы өнімін өндірушілер ірі қара, қой, жылқының аналық басына сатып алатын жемшөп құнын арзандату мақсатында қарастырылған 148,0 млн. теңге биыл жыл соңына дейін жергілікті бюджет есебінен қосымша 100 млн. теңгеге толығатын болады.
Қалада жайылым жерлер аз екені рас. Осы мәселені шешу үшін келесі жылдан бастап озық технологияның көмегімен гидропоника әдісі шаруашылықтарға ендіріледі. Тарқатып айтқанда, жабық кеңістікте 2 келі астық дәнін сеуіп, 7 күнде 12 келіге дейін мал азықтық дақылын алуға болады. Бұл әдіс арқылы алынған мал азықтық дақылдарының құнарлылығы артып, өнімділік те арта түспек.